Yekmal Bremen wek cihê hevdîtina malbatan bi çalakîyên cihêreng

Dema ku me di îlona 2022-an de şaxa xwe ya li Bremenê ava kir, me soz dabû ku di demeke nêz de bibin cihê çûyin û hatinê ya malbatan. Em niha soza xwe pêk tînin û cihê xwe yê ku me di Sibata 2023-an de kirê kir, vediguherînin navenda danûstandina malbatan. Navend wê navçandî û pirzimanî be. Ev projeya ku me daye ber xwe bi piştgirîya darayî û alîkarîya Weqfa VINCI pêk tê. Bi bicihanîna projeyê cihê me li gor hewcedarî û pêwistîyên malbatan tê avakirin.

Paralel bi avakirinê re, em dest bi çalakîyên xwe yên cûr bi cûr dikin. Wekî nimûne projeya me ya  danûstandina niştecîhên kevn û nû yên Bremenê – ku ji aliyê Senata Bremenê ji bo Karûbarên Civakî, Ciwanan, Entegrasyon û Werzişê tê piştgirîkirin. Wekî din kursên MiA dê dest pê bikin – ku ji alîyê Sazîya Koçber û Penaberan ya Federal – tê piştgirîkirin. Herweha li navenda me wê dersên Kurdî bên dayîn. Bi rêya van projeyan ji bo koçberan derfetên têkilîya bi civaka li vir re tên afirandin, karîna wan ya bi zimanê Almanî pêş de diçe û şansê wan ji bo beşdarbûna jiyana civakî bêhtir dibe.

Em ji bo hemû ziman û çandan vekirîne û bi dilgermî malbat û kesan vedixwînin da ku beşdarî kar, proje û çalakîyên me bibin û bi me re şikil bidin şaxa me.