Xelata Yekmalê ji bo baştirîn kurtefîlmê 15. Festîvala Fîlmên Kurdî ya Berlînê

Festîvala Fîlmên Kurdî ya Berlînê ya 15an ji 25ê Îlonê heta 1ê Cotmeha 2025an pêk hat. Komeleya Yekmalê hevkarê demdirêj ê festîvalê ye û her sal xelatekê pêşkêş dike. Îsal xelata me ya 1,000 €  ji baştirîn kurtefîlma pêşbirkê re hat dayîn.

Xelat ji belgefîlma kurt Navê me biyanî ye (Our Name is Foreigner) re hat dayîn. Di destpêkê de me ragihandibû ku xelat ji bo baştirîn kurtefîlma zarokan e, lê ji ber kêmbûna serlêdanan, Yekmalê biryar da ku xelat bikeve bin kategoriya giştî ya Kurtefîlman.

Merasîma xelatdayînê di 30ê Îlonê de li Sînemaya Babylon pêk hat. Rêvebera me ya Giştî, Günay Daricî xelat pêşkêş kir. Lê ji ber ku derhêner nikaribû amade be, bi nûnertiya derhênera belgefîlmê Selin Besili ji aliyê koordînatorê festîvalê Rezan Abduleziz ve hat wergirtin.

Fîlma serketî: Navê me biyanî ye

Juriya me ev kurtefîlm hilbijart ji ber awayê wê yê bêhempa yê ronîkirina rastiya zarok, ciwan û malbatan li Diyasporayê - rastiyek ku em wek Yekmal di xebata xwe ya rojane de piştgirî dikin û nûnertiya wê dikin.

Di vê fîlmê de, çar xwişk û bira ku hin ji wan li Swîsreyê ji dayik bûne û hin jî li wir mezin bûne, ezmûnên xwe yên rojane yên bi nijadperestî û cudakariyê re vedibêjin. Ew li wateya girêdayîbûnê lêkolîn dikin ka çima ew wekî "cuda" têne dîtin, û çawa ew fêr dibin ku bi wê re tevbigerin. Bi vê yekê, ew li ser biyografî û eslê xwe difikirin û helwestên ku ew di encamê de ji bo jiyana xwe pêş dixin nîşan didin.

Di heman demê de, belgefîlm gelek zarok, ciwan û malbatên Kurd temsîl dike ku li Tirkiye û dîyasporayê bi nijadperestî û cudakariya dijî-Kurd re rû bi rû ne.

Juriya Yekmalê

Fîlmê serkeftî ji aliyê juriyeke sê endamî ve hat hilbijartin ku ew di qada perwerdehiyê, çandî û mafên mirovan de çalak in:

• Özgül Bendes
  xebatkareke civakî ye û xwedî ezmûneke berfireh e di perwerdeya zarokatiya zûdem de. Wekî rêvebera tîmê, rahêner û şêwirmenda malbatê, rola wê hebû di pêvajoya damezrandina zaroxaneya me ya Pîyayê ya dûyemîn û paşê jî rêveberiya wê girt ser xwe. Ew niha rêvebera pêşxistina şaxên Yekmalê ye. Qadên pisporiya wê pêşkeftina zarokatiyê, parastina zarokan, fêrbûna ziman û pirzimanî ne. Herweha ew berpirsa parastina zarokan e li Yekmalê.
• Shaswar Mame
  rojnamevanek serbixwe û çalakek civaka sivîl e. Ew hem li Kurdistanê û hem jî li Ewropayê xwedî ezmûneke berfireh e di medya û rêxistinên civaka sivîl de. Bala wî li ser pirrengiya înterseksiyonal, mafên mirovan û têkoşîna li dijî cudakarî û nijadperestiyê ye. Ew niha rêveberê Beşa Têkiliyên Giştî û Medyayê ye li komeleya Yakmalê. Bi salan e, ew bi awayekî çalak di qadên perwerdehiyê û çandê de di nav civaka Kurd de li Almanyayê kar dike. Ew bi taybetî pabendî pêşxistina zimanê Kurdî û xuyabûna nasname û çanda Kurdî ye.
• Bariş Seyitvan
  hunermend û kuratorekî serbixwe ye. Ew xwedî ezmûna pîşeyî ya bîst salan e di hevkariya bi saziyên hunerê, hunermend û rêxistinên ne-qezencxwaz re. Bala wî li ser hunera hemdem û koçberiyê li Rojhilata Navîn e. Xebata wî li rastiya transneteweyî ya civaka Kurd li cîhanê vedikole. Pêşangehên Seyitvan li ser mijarên ji dîrok, erdnîgarî û siyasetê, herweha pirsgirêkên çandî yên berfirehtir ên wekî ziman, sirgûn, zayend û koçberiyê ne. Ew niha li Akademiya Yekmalê wekî mamostayê Kurdî û li komeleya Yekmalê wekî dîzaynerê grafîk di tîma medyayê de dixebite.