WIRKT! – Bihêzkirina beşdariya dêûbavan

WIRKT! (bi Kurdî: bandor dike) projeyek nû ya Yekîtiya Malbatên ji Kurdistanê li Almanya (Yekmal)ê ye li Berlînê. Armanca projeyê ew e ku beşdariya dêûbavan bi awayekî domdar hêzdar bike. Bi rêya zanîna hevpar, înîsiyatîvên hêzdarkirî, qadên ku nû hatine avakirin û pêşxistina jêhatîbûnan, WIRKT! beşdariya rastîn û bibandor pêş dixe.

Xebata me ya demdirêj bi koçber û penaberan re - bi taybetî bi dê û bavan re - bi awayekî zelal nîşan dide ku formên klasîk ên beşdarbûnê di dibistan û zaroxaneyan de, wekî civînên mamostayan bi dê û bavan re, xebata lîjneyê, rûniştinên agahîdanê an platformên dîjîtal nagihîjin gelek dê û bavan. Ji bo wan formatan pir caran zanîna zimanê Almanî bi awayek baş, ezmûna danûstandina bi saziyan re û zanîna pêkhateyên beşdarbûnê yên heyî pêwîst in. Gelek dê û bav behsa astengiyên zimanî, serpêhatiyên cudakariyê û nebûna gihîştinê dikin. Di encamê de, perspektîv û pêdiviyên wan pir caran nayên dîtin.

Projeya WIRKT! tam li ser van mijaran disekine. Armanca wê ew e ku formên beşdarbûnê yên domdar pêş bixe ku ji nav civakan derdikevin, li wir bicîh dibin û têne xuyang kirin. Baldarî li ser pêvajoyên fêrbûna kolektîf, pêşxistin û belavkirina jêhatîyên beşdarbûnê û hevkariya nêzîk bi rêxistinên din ên koçberan re ye. Bi hev re, dê ezmûn werin parvekirin, pirsgirêkên hevpar werin destnîşankirin û perspektîvên kolektîf bînin ber çavên saziyên perwerdehiyê, hikûmet û siyasetê.

Proje di çarçoveya Bernameya „Das Partizipations- und Integrationsprogramm“ ji aliyê Wezareta Kar, Sosiyal, Wekhevî, Întegrasyon, Pirrengî û Dij-Cûdakariyê ya Senatoyê ve tê fînansekirin.