Li Foruma Humboldtê Newroz hat pîrozkirin

Di 21ê Adarê de, Foruma Humboldtê bi hevkariya heft komeleyên Berlînê di nav de komeleya Yekmalê, bernameyeke cihêreng ji bo pîrozkirina Cejna Newrozê lidar xist. Bername rastî eleqeyek mezin hat û mêvanan ji gelek çalakiyên wek axaftin, muzîk, govend, workşop, firoşgeh û xwarinên taybet kêf girtin.

Rêvebera Giştî ya komeleya me Günay Daricî gotarek pêşkêş kir û komeleya Yekmalê da nasîn û Cejna Newrozê li hemû kesên ku Newrozê pîroz dikin, pîroz kir. Herweha li ser girîngiya Cejna Newrozê ji perspektîva kurdan axivî.

Beşek girîng a bernameyê panela Yekmalê ya li ser "Wateya Cejna Newrozê ji bo Malbatên Kurd." bû. Herdû rêveberên me yên Navenda Pirrengiya Înterseksiyonal Rojda Arslan û Matthias Hofmann tevî nivîskar Peshraw Mohammed û moderator Azita Sharafkandi di gotûbêjê de beşdar bûn.

Di panelê de behsa dîroka dirêj a cejna Newrozê di dîroka Kurdan de hat kirin ku vedigere zêdetirî 700 salan berî zayînê. Herweha wateya Cejna Newrozê ji bo Kurdan, çawaniya pîrozkirina vê cejnê li Kurdistan û dîasporayê, cihê wê di çanda Kurdî de, girîngiya wê ya siyasî û rola wê di têkoşîna Kurdan a ji bo azadî, maf û nasnameyê de hatin şîrovekirin.

Em gelek spasiya Foruma Humboldtê dikin ji bo lidarxistina vê bernameyê û hevkariya hêja ya di navbera me de.