Roja Navneteweyî ya bîranîna qurbaniyên Holokostê

27ê Çileya Paşîn roja navneteweyî ya bîranîna qurbaniyên Holokostê ye.

Em wekî Yekîtiya Malbatên ji Kurdistanê li Almanyayê (Yekmal e.V.), bi mîlyonan mêr, jin û zarokên Cihû, herweha hemû mirovên din ên ku di dema rejîma Naziyan de rastî zilm, bêmafî û kuştinê hatine, bi bîr tînin. Holokost sûcek bêhempa ya li dijî mirovahiyê bû.

Sala 2005’an Neteweyên Yekbûyî di 60. salvegera rizgarkirina kampa Auschwitz-Birkenauê de, 27ê Çileya Paşîn weke Roja Navneteweyî ya Bîranîna Qurbaniyên Komkujiya Holokostê diyar kir. Di navbera salên 1940-1945’an de li Auschwitz’ê herî kêm 1,1 mîlyon mirovên Cihû jiyana xwe ji dest dan. Di jenosîda Holokostê de bi giştî şeş mîlyon Cihû ji aliyê Naziyan ve hatine kuştin.

Ev bîranîn ji bîranîneke rabirdûyê bêtir e. Ev bîranîn hişyariyek û pabendbûnek e ji bo dema niha. Ji ber ku dûrxistin û tundûtûjiya li dijî kêmîneyan, mixabin ne tiştên rabirdûyê ne.

Heta îro jî, mirov rastî zilm, koçberî û gefên hebûnî tên – wek mînak gelê Kurd li Sûriyeyê. Kurdan bi salan li dijî rejîma Esed û rêxistina bi navê "Dewleta Îslamî" DAIŞê tekoşîn kirin. Kurdan beşdariyeke girîng di şerê li dijî terorîzmê de kirin û bi vî awayî civaka navneteweyî parastin. Lêbelê ew hîn jî bi êrîşên mezin, bêmafiya siyasî û tundûtûjiyê re rû bi rû dimînin.

Hikûmeta veguhêz a niha tevî çekdar û komên cîhadîst, careke din nîştimana Kurdan dikin armanca êrîşên xwe. Kêmîneyên din ên wekî Durzî, Elewî, Êzidî û Xiristiyan jî ji ber zext, cudakarî û tundûtûjiyê bandor dibin. Ev pêşhat fikareke mezin çê dike.

Ev rewş tîne bîra me ku çiqas girîng e em zû lê binêrin, bêdeng nemînin û li her derê mafên mirovan biparêzin.

Holokost bêhempa ye û divê qet neyê nisbîkirin. Lê ji bîranîna wê berpirsiyariya me derdikeve holê ku em bi biryardarî li dijî hemû cureyên dij-Cihû, nijadperestî, nijadperestiya dij-Kurd, nijadperestiya dij-Êzidî û zilma etnîkî û olî derkevin.

27ê Çileya Paşîn 2026