لە پشووەکانی زستانیشدا دەرگەکانی یەکماڵ کراوە بوون

نێوەندەکانی خێزان-ی سەر بە ڕێکخراوەکەمان لە کرۆیتسبێرگ و نۆیکۆلن لە پشووی زستانەی بەرلین کراوە بوون و سەرەڕای بەرنامەی ئاسایی هەفتانە، چالاکیی تایبەتیان پێشکەشی منداڵان و خێزانەکان دەکرد.

ڕۆژانی ٤ و ٦ی شوبات لە نێوەندی خێزانی هایدێک، دەرفەت بۆ منداڵان، دایکان و باوکان ڕەخسا تا پێکەوە یاری بکەن. جگە لە یارییە تەختەییەکان، وافلی تازە کە لە لایەن دایکان ئامادە کرابوو، هەروەها چالاکیی پڕ لە جووڵە بۆ منداڵان کەشێکی زیندوویان دروست کرد.

لە لایەکی دیکەوە ڕۆژی ٤ و ٥ی شوبات، نێوەندی دیداری خێزان لە بۆدینبۆکس بە چالاکییەکی داهێنەرانەی تایبەت دەرگەکانی کردەوە. منداڵان دەیانتوانی بووکەڵەی خۆیان دروست بکەن، دایکان و باوکانیش دەرفەتیان قۆستەوە تا پێکەوە لەسەر خواست و پێداویستییەکانیان بۆ ئەم ساڵ قسە بکەن. هیوایان خواست لەم ساڵەدا گەشت و گەڕان بۆ خێزانەکان و چالاکییەکانی دەرەوە بۆ منداڵان زیاتر ڕێکبخرێن. ئێمە لە ئێستاوە بەوپەڕی خۆشحاڵییەوە چاوەڕوانین لەگەڵ خێزانەکان بەنێو شار و سروشتدا بگەڕێین!