دوایین ڕۆژی “میا-کۆرس بۆ ژنان” لە هێرفۆرد

١١ی دیسەمبەر دوایین ڕۆژی خوولێکی دیکەی کۆرسی ژنان (میا-کۆرس) بوو لە هێرفۆرد. ئەم کۆرسە لقی یەکماڵ لە هێرفۆرد بە پشتیوانیی دارایی فەرمانگەی فیدراڵی بۆ کۆچ و پەنابەران (BAMF) سازی دەکات.

بەشدارانی کۆرسەکە بەر لەوەی سەردانی بازاڕی کریسمس بکەن، پێکەوە نانی بەیانییان خوارد. بازاڕی کریسمس لە گێنزەمارکت-ی هێرفۆرد ئەمساڵ بە کۆنسێپتی “١٠٠١ شەو –  کریسمسی کولتوورەکان” کراوەتەوە و چەندین کوخی کولتوورە جیاجیاکان لەخۆ دەگرێت.

دیمەنی ڕێوڕەسمی جەژنی دیوالیی هیندستان، “خێمەی بادیەنشینان” بە دەستی فاتمە و جەژنی ئێزیی ئێزیدییەکان سەرنجی بەشدارانی کۆرسەکەی ڕاکێشا.
جەژنی ئێزی یەکێکە لە سێ جەژنی ئێزیدییەکان کە دەکەونە سێ هەفتەی سەرەتای مانگی دیسەمبەر. ئێزیدییەکان بەر لە هەر کام لەو جەژنانە، سێ ڕۆژ بەڕۆژوو دەبن. لە هەفتەی یەکەمدا جەژنی شێشمس، دواتر جەژنی خوودان و لە هەفتەی سێیەمیشدا جەژنی ئێزی پیرۆز دەکرێت.