بەرنامەی ڕۆژانی کولتووری کوردی – ٢٠٢٤

ئێمە وەک یەکماڵ شادمانین کە بەرنامەی ئەمساڵی ڕۆژانی کولتووری کوردیتان پێ ڕادەگەیەنین.
لە ساڵی ٢٠١٧ بەدواوە، ساڵانە کۆمەڵەکەمان بەرنامەیەک بە ناوی “ڕۆژانی کولتووری کوردی” لە ئەڵمانیا ساز دەکات. ئامانجمان ئەوەیە، کولتووری کوردی بناسێنین.

ئەم زنجیرەچالاکییە لە ٢١ی ئاداردا کە کاتێکی زۆر تایبەتە بۆ کوردان، دەست پێدەکات. کوردان لە کوردستان، دەستپێکی بەهار وەک سەری ساڵ پیرۆز دەکەن. لەو ڕۆژەدا ساڵێکی نوێ دەست پێدەکات و سروشت خۆی نوێ دەکاتەوە و دەست بە ژیانێکی نوێ دەکات. بۆ کوردان نەورۆز سمبوولی ئازادی و ڕزگاربوون لە بندەستییە.

لە چوارچێوەی ڕۆژانی کولتووری کوردیدا، ئەمساڵ چەندین چالاکیی وەک پێشانگە، گفتوگۆ، وۆرکشۆپ و چالاکیی دیکە لە بەرلین، ئێسن، بیلەفێلد و هێرفۆرد ساز دەکرێن. چالاکیی سەرەکیش ئاهەنگی نەورۆزی منداڵان و خێزانەکانە.